2026/01/06

Ostegun honetan, urtarrilak 8, 10:00etan, Eibarko Ikasten elkarteak zinema eta film laburren inguruko hitzaldi kultural berri bat jasoko du Portaleko areto nagusian, Asier Errasti Film Laburren Jaialdia posible egiten duen Plano Corto elkarteko kide den Juan Aldayren eskutik. Hitzaldia jaialdiaren beraren inguruan izango da: bere jatorria, filosofia eta gaur egun hiribilduko kultura eta ikus-entzunezkoen panoraman jokatzen duen papera.

Asier Errasti Film Laburren Jaialdia Eibarko kultur agendaren barnean dagoeneko ezaguna den hitzordua da. Laburmetraiari ikusgarritasuna ematea, talentu berriei laguntzea eta zinemaren hizkuntza herritarrei hurbiltzea du helburu. Proiekzio, topaketa eta jarduera paraleloen bidez, zinemaldia begiradak, istorioak eta zinema ulertzeko era anitzak partekatzeko plataforma bihurtu da.

Nor izan zen Asier Errasti?

Asier Errasti Muguruza Eibarren jaio zen 1972ko otsailaren 15ean. Eibarko Institutuan UBI (COU) ikasketak amaitu ondoren, Andoaingo Zinema eta Bideo Eskolara joan zen irudi, soinu eta errealizazio ikasketak garatzera. Behin horiek bukatuta, familia enpresan hasi zen lanean, lana eta zinemari buruzko hainbat ikastaro uztartuz. 1995ean, zinema-zuzendaritzako ikastaro espezializatu bat egin zuen, José Luis Guerin zinemagileak emana.

KTB tokiko telebistan lan egin zuen kamerari gisa 1996tik 1998ra, batez ere Kirolak atalean; aurretik ere aritu zen lankidetzan sail horretan. 1998ko udan Ingalaterrara joan zen ingelesa ikastera; urtebete egin zuen. 1999ko uztailean, errealizazio-laguntzaile kontratua sinatu zuen Pausoka ekoiztetxearekin, “El Señorío de Larrea” telesailerako. ETBko “Barrebusa” programan parte hartu zuen 2000. urtean errealizazio eta gidoi lan ezberdinetan.

Urte bereko urrian, ETBrekin “1999” bere film laburraren erreprodukzio eskubideak lagatzeko kontratua sinatu zuen. Ordurako Eibarko Film Laburren Jaialdiaren bi edizio martxan jarriak zituen Plano Corto saileko lankideekin, zeinak, Asier hiltzean, bere oroimena omendu nahi izan zuten jaialdiari bere izena jarriz baina, batez ere, berak hasitako bideari jarraituz.

2000. urteko azaroaren 2an hil zen bat-batean, 28 urte zituela, oraindik bere amets guztiak garatzeko denborarik gabe.