2026/03/09

Ikasten elkarteak datorren ostegunean, 10:00etan, bere asteroko hitzaldien saio berri bat egingo du Portalean, oraingo honetan artearen munduari eskainia. Jose Antonio Azpilikueta Albizu marrazkilari eibartarra izango da protagonista, eta ‘Marrazkia’ izeneko hitzaldia eskainiko du.
Izenburua laburra bada ere, gaiak oso ibilbide luzea du hizlariarentzat. Izan ere, Azpilikuetak 37 urte eman ditu eguneroko lanean marrazkigintzan, eta praktika horrek markatu du bere ibilbide profesional eta artistikoa. “Hitzaldiaren izenburua oso laburra da, ‘Marrazkia’, baina horretan inbertitu dut denbora gehien 37 urtez, eta hori oso luzea da”, azaldu du.
Marrazkilariak aitortzen duenez, diziplina horretan aritzen direnei sintesirako gaitasuna aurresuposatzen zaien arren, trebetasun hori batez ere marrazteko momentuan aplikatzen da. Marrazkiari buruz hitz egitea, aldiz, beste istorio bat da. Hori dela eta, bere mintzaldia marrazkiari buruzko sarrera labur batekin hasiko du, historikoki izan denaz, gaur denaz eta, bere ustez, izaten jarraitu beharko lukeenaz hausnartuz.
Lehen hurbilketa horren ondoren, hitzaldia bisualagoa eta praktikoagoa izango da. Azpilikuetak “eskemen artxiboa” kontzeptuarekin zerikusia duten hainbat ideia, estrategia eta ariketa azalduko ditu, Ernst H. Gombrich artearen historialariak marrazkilariek formak eraikitzeko erabiltzen dituzten eredu mentalak deskribatzeko asmatutako terminoa.
Marrazketaren ikaskuntzaren logika laburbiltzen duen printzipio hori modu herrikoian islatzen da “seia eta laua, zure erretratuaren aurpegia” baliabide grafiko ezagunean. Adibide erraz horrek erakusten du nola, oinarrizko eskemetatik abiatuta, marrazkilariak irudi konplexuagoak eraiki ditzakeen.