2025/04/08

Ostegunean beste hitzaldi bat izango dugu Armeria Eskolan, azkena Aste Santuko oporren eta Maiatzaren 1eko zubiarengatik etenaldia egin aurretik. Izan ere, hurrengo hitzaldia maiatzaren 8an eskainiko da.

Oraingo honetan Aitor Eriz herri-lanetako ingeniari teknikoa eta gaur egun Trafikoko eta Mugikotarsuneko aholkulari senior eibartarra izango dugu hizlari. ‘Mugikortasuna azpiegitura handietan eta hiri-inguruneetan’ izeneko hitzaldia eskainiko du, eta bertan azalduko duenaren inguruan mintzatu zaigu, aurrerapen gisa.

Solasaldiarekin hasteko, bere burua aurkeztuko du. “Atzerrian (Brasilen, Erresuma Batuan eta Arabian)izandako esperientzia azalduko dut mugikortasunaren eta trafiko ingeniaritzaren ikuspuntutik”, esan digu.

Gaian kokatu ondoren, azpiegitura handietan (geltoki intermodalak, aireportuetan, futbol zelaietan, eta abar) egon daitezkeen mugikortasun arazoak plazaratuko ditu, “eta hauek zelan planifikatzen diren mugikortasun arazorik ez edukitzeko”, zehazten digu.

Saioari amaiera emateko, hirietan mugikortasuna nola planifikatzen den azalduko du. Horretarako, hiri handi batzuen “adibide txikiak” jarriko ditu eta gero Eibarko kasua aztertuko du.