2025/05/14

Amaitzear da Debabarreneko Esperientzia Eskolaren XX. ikasturtea. Hilaren 23an, 11:30ean, ikasturte amaierako ekitaldia egingo dute Armeria Eskolan, eta bertan parte hartuko dute Jon Iraola Eibarko Alkateak, Ana Mandiola eta Aitor Alberdik Ikasteneko presidenteordea eta diruzainak, eta XX. promozioko Ina Urteagak, Kontxi Telleriak eta Cristina Salasek.

Santiago Castro Ikasteneko partaideak aurkeztuko du saioa eta 40 minutuko iraupena izango du. Bertan, aurkezpeneko hitzaldien ondoren, promozio berriko ikasleak banan bana igoko dira oholtzara diplomak jasotzera.

20 ikasle, denak emakumeak

Esperientzia Eskolaren 20. edizioan Ermuko, Soraluzeko eta Eibarko 20 ikaslek hartu dute parte eta, lehen aldiz, den-denak emakumezkoak izan dira.

Ikasturtean zehar hainbat ekintza egin dituzte Esperientzia Eskolako ikasleek eta proiektu bat garatu dute, hilaren 23ko ekitaldian argitaratuko dutena.