2026/02/24

Ikasten elkarteak beste hitzaldi bat antolatu du ostegun honetan Portalean (10:00etan), “Pentsioek etorkizunik ba al dute?” izenburupean, eta Eduardo Garcia Elosua Gizarte Segurantzako langile eta sistema publikoa sakon ezagutzen duenak emango du.

Eztabaida publikoan aldian-aldian berpizten diren mezu alarmistetatik urrun, tesi argia defendatuko du Garcia Elosuak: pentsioak bideragarriak dira orain eta hemendik 30 urtera, baldin eta haien iraunkortasuna bermatzeko borondate politikoa badago. “Daukagun politika publiko distributiboena da”, dio, eta horregatik funtsezkotzat jotzen du “ideien bataila” ematea.

Hizlariak azpimarratuko du pentsioen inguruko eztabaida ez dela teknikoa eta akademikoa soilik, guztiz ideologikoa baizik. Bere iritziz, argi eta garbi bereizitako ereduak aurrez aurre jartzen ditu: publikoa pribatuaren aurrean, banaketa-sistema kapitalizazio-sistemaren aurrean. “Ez da kontu neutroa”, azaldu du, zein gizarte eredu nahi dugun eztabaidatzea baizik.

Belaunaldien arteko ustezko konfrontazioa izango da landuko duen alderdietako bat. Gipuzkoako batez besteko erretiro-pentsioa 1.800 eurotik gorakoa dela —gazte askoren batez besteko soldata baino kopuru handiagoa— bezalako datuak argitaratzen diren honetan, belaunaldiei aurre egiteko saiakeren kontra ohartarazi du Garcia Elosuak. Bere ustez, gazteen prekarietatea ez dute esplikatzen egungo pentsioek, baizik eta desindustrializazioa, zerbitzuen sektoreko enplegu prekarioen ugaritzea, enpresen soldata politikak eta, bereziki, etxebizitzaren kostu handia bezalako faktoreek. Gainera, gogorarazi du soldata baxuek kotizazio baxuak dakartzatela, eta, beraz, etorkizunean pentsio baxuagoak.

Pentsiodunen mugimenduaz ere hausnarketarako tartea izango da, bere garaian Fatima Bañez orduko ministroak iragarritako %0,25eko igoeraren ostean protagonismo sozial handia izan baitzuen, eta denborarekin gutxieneko soldata eta gutxieneko pentsioa parekatzea bezalako aldarrikapenen inguruan sortu diren barne eztabaidez ere bai.

Gizarte Segurantzan duen esperientzia profesionaletik abiatuta, García Elosuak sistemaren konplexutasuna eta kotizazioak, erregimenak edo gutxieneko pentsioen hobekuntza bezalako gaiak zorrotz aztertzeko beharra erakusten duten adibide praktikoak emango ditu. “Eztabaida konplexua da eta ez du sinplifikaziorik onartzen”, azpimarratzen du.

Hitzaldia irekia da eta, Ikasteneko jardueretan ohikoa den bezala, galderak egiteko eta eztabaidatzeko txanda izango da. “Pentsioei buruzko hitzaldi bat agian ez da erakargarriena lehen begiratuan —aitortzen du hizlariak—, baina hain zuzen ere horregatik da garrantzitsua kontzeptuak argitzea eta ideiak kontrastatzea”.

Ongizate Estatuaren zutabe nagusietako bati buruz datu eta argudioekin gogoeta egiteko hitzordua.