2025/11/25

Javier Gómez Zapiainek, EHUko Sexualitatearen Psikologiako irakasle titularrak, ‘Lotura afektiboaren eta sexu-desioaren artean’ hitzaldia eskainiko du ostegun honetan, azaroak 27, 10:00etan, Portaleko areto nagusian.

Hitzaldiaren edukiaz galdetuta, Gomez Zapiainek honako hau komentatu digu: “Pertsonen ongizatea bizi-zikloan zehar dituzten behar oinarrizkoenak asetzearekin lotzen da. Horien artean, bi dira benetan garrantzitsuak: lotura afektiboa eta asebetetze erotikoa. Herri-hizkeran esanda: maitasuna eta sexua. Sexu-desira motibazio indartsua da, eta bestea aurkitzean plazer erotikoa bilatzera bultzatzen du norbanakoa. Maitasunak gizakia bultzatzen du lotura bat bilatzera, hau da, beste pertsona batekin harreman pribilegiatu bat bilatzera, baldintzarik gabekoa, sentibera eta iraunkorra bezala hautematen dena, egonkortasun emozionalerako funtsezko erreferentzia”.

Irakaslearen hitzetan, “atxikimenduaren teoria esparru aproposa da bi dimentsioen elkarreragina ulertzeko. Gizakiak, atxikimendu-irudiekin izan dituen harreman lotesleen historian zehar, barne-ereduak eratzen dituzten irudikapen mentalak integratzen ditu, eta horiek atxikimendu-estiloetan adierazten dira. Horiek arautuko dituzte pertsonen arteko harremanak, bereziki hurbiltasun psikologikoarekin eta intimitate erotikoarekin lotutakoak”.